وجه المطرب أحمد بحر الشهير بلقب" كزبرة" رسالة خاصة لنجم الجيل تامر حسني وذلك بعد تعاونه معه بأغنية "قلودة" والتي من المقرر طرحها خلال الأيام القادمة .

ونشر كزبرة صورة له برفقة تامر عبر صفحته الرسمية "فيس بوك" وكتب" انا بس حابب أقول حاجة في حق الراجل ده تامر حسني ده فنان كبير بمعني الكلمة لأنه بيعرف يواكب العصر، وعارف ازي يتعامل مع الجيل الجديد وثقافته لانه فاهم يعني ايه ثقافة مصرية وفاهم ان المهرجان ده مزيكا مصرية بتفرح الناس البسيطة في افرحهم ومش بس البسيطة بتفرح كل الطبقات وبتمثل الشارع المصري". 

وأضاف "مزيكا المهرجان ليها مكانتها في كل دول العالم  والغرب برة بيقدروا نوع المزيكا دي ولو في ناس هتختلف علي الكلام ده الزمن هيثبتلكم ده قدام وكلها أيام الاغنية هتنزل وهتعجب كل الناس".

في نفس السياق كان نشر تامر حسني مقطع فيديو له عبر حسابه الرسمي بموقع التيك توك، يجمعه مع كزبرة وبطريقة طريقه من كواليس التحضير للأغنية، وكتب: "نورتني يا حبيبي.. طبعا دي أقل حاجة في هزارنا العادي.. يلا استنونا شوية وهنزلكم حتة من أغنيتنا اللي بنحضرها من كام يوم عشان نغنيها في حفلة RedBull Jukebox، بس احفظوها صم عشان شكلكم هتهدوها لناس كتير.. وأحسن 10 هيعملوا حركات الأغنية صح هنعزمهم على الحفلة، وكمان هنطلعهم يعملوها معانا على المسرح.. ودي يا بحر".

وجاء ذلك بعدما فاجأ النجم تامر حسني جمهوره خلال إحدى حفلاته بالإعلان عن تعاون غنائي جديد يجمعه بالمطرب الشعبي أحمد بحر، الشهير بلقب "كزبرة"، وذلك من خلال مقطع فيديو طريف عُرض على المسرح، نال إعجاب الحضور وأثار ضحكاتهم.

وعقب الحفل، نشر تامر صورة تجمعه بكزبرة عبر حسابه الرسمي على موقع "إنستجرام"، وعلق عليها قائلاً: "حبيب قلبي بحر البحور هيشاركني في أغنية شعبي."، ما زاد من حماس المتابعين وترقبهم لطرح العمل المنتظر خلال الفترة المقبلة.